Ndërsa konflikti në Ukrainë po vazhdon, diskutimet në mbarë botën për perspektivën e një lufte bërthamore të shkaktuar nga Rusia janë ndoshta aq të larta sa s’kanë qenë ndonjëherë. Dhe për të shtuar edhe më tepër spekulime, një avion famëkeq është parë të fluturojë dje mbi qiellin e Europës duke shoqëruar Presidentin amerikan Joe Biden. Avioni Nightëatch, i cilësuar si “avioni i ditës së fundit të botës” njihet ndryshe edhe si “Pentagoni Fluturues”. Është një avion ushtarak komandues dhe kontrollues strategjik i operuar nga Forcat Ajrore të Shteteve të Bashkuara, i cili shërben si një post komandimi i lëvizshëm në rast lufte. Avioni i madh mund të strehojë një ekuipazh deri në 112 persona duke përfshirë personelin e fluturimit dhe misionim. Ky është ekuipazhi më i madh i çdo avioni në historinë e Forcave Ajrore të SHBA. Ai gjithashtu – nëpërmjet furnizimit me karburant në ajër – teorikisht mund të qëndrojë duke fluturuar për një javë në raste urgjente. Aeroplani është i mbrojtur nga efektet e rrezatimit bërthamor dhe mund të përballojë temperaturat e larta të shkaktuara nga një shpërthim.