Marrëdhëniet mes Maqedonisë së Veriut dhe Greqisë vijojnë të jenë të tensionuara pas ardhjes në pushtet të partisë VMRO-DPMNE. Një gjë e tillë u pasqyrua edhe në Samitin e NATO-s, ku kryeministri grek Kyriakos Mitsotakis edhe njëherë tjetër akuzoi drejtpërdrejt homologun e tij Mitskoski se nuk po I përmbahet marrëveshjesh së Prespës. Kam informuar kolegët e mi -ka thënë ai -për faktin se kryeministri i Maqedonisë së Veriut ka zgjedhur të mos zbatojë një nen vendimtar të Marrëveshjes në lidhje me emrin e unifikuar të shtetit fqinj brenda dhe jashtë vendit, dhe ta quajë thjesht “Republika e Maqedonisë” brenda kufijve, diçka që shprehimisht është e ndaluar nga Marrëveshja. Ai paralajmëroi kundërpërgjigje ndaj Shkupit nëse do vijojë të mos I përmbahet paktit të arritur mes dy vendeve. “Besoj se në një mënyrë apo tjetër kjo është diçka që udhëheqja e Shkupit do ta kuptojë. Në çdo rast, Greqia nuk do të zbulojë në këtë moment armët që ka në dispozicion për t'iu përgjigjur një këmbënguljeje të mundshme të lidershipit të vendit fqinj në këtë taktikë”, nënvizoi Mitsotakis.