Në një mëngjes pranvere me re në një nga lagjet me popullsi më të dendur në Athinë, mijëra fidanë të mbjellë në një park të vogël në majë të kodrës shënojnë një përpjekje të re për të përballuar nxehtësinë gjymtuese në kryeqytetin grek, por përpjekja për kritikët është shumë e vonuar. Ky është "mikro-pylli" i parë i Athinës, pjesë e një nisme të kryetarit të bashkisë së zgjedhur së fundmi, Haris Doukas për të mbjellë 5000 pemë në vit në qytetin e betonuar, ku në verë mërkuri në termometër ngjitet në mbi 40 gradë Celsius. Mbjellja e pemëve është thelbësore për të ndihmuar qytetet të mposhtin nxehtësinë, thonë shkencëtarët, pasi ndryshimet klimatike shkaktojnë valë të nxehti gjithnjë e më përvëluese dhe më intensive, vecanërisht në qendrat urbane me ndërtesa të ngritura pranë e pranë. Por fidanët e rritur deri në gjunjë në parkun Alepotrypa, në lagjen Kypseli të Athinës, do të kërkojnë të paktën një dekadë për tu rritur sa duhet. Ata janë "shumë pak, shumë vonë", thotë Katerina Christoforaki, një arkitekte dhe planifikuese urbane në Universitetin Teknik të Athinës, e cila ka punuar në projektet e kaluara të rizhvillimit të qytetit.