Policia e Shkodrës është vënë e gjitha në lëvizje për zbardhjen e vrasjes së 32-vjeçarit Endri Mustafës. Burimet bëjnë me dije se blutë e Shkodrës kanë ndaluar dy persona si edhe kanë shpallur në kërkim një tjetër. Pak orë pas ngjarjes në policinë e Shkodrës janë shoqëruar 8 persona të cilët dyshohet se kishin dijeni për këtë ngjarje, ndërkohë që pas disa orësh hetime, policia ka ndaluar dy prej tyre. Mësohet se ndaj tyre janë kryer veprimet procedurale dhe janë ndaluar si të përfshirë në vrasjen e rëndë që tronditi Shkodrën. Ibrahim Lici dyshohet si autori kryesor i ngjarjes, i cili eshte shpallur në kërkim. Nga ekspertiza rezulton se viktima është ekzekutuar me 6 plumba, tre në gjoks, 2 në kokë dhe një në gojë. Viktima sipas uniformave blu ishte denoncuar nga familjarët e tij prej 3 ditësh i zhdukur dhe vetëm mbrëmjen e së dieles është mësuar fati tragjik i tij. Policia e ka të skeduar viktimën për disa ngjarje në qytet, ndërsa për zbardhjen e vrasjes së tij është ngritur një grup pune me ekspertë të kriminalistikës, nën drejtimin e prokurorisë së rrethit gjyqësor Shkoder.