Një asteroid i madh i njohur si 2024 YR4 ka pushtuar titujt e lajmeve këtë javë pasi shkencëtarët fillimisht rritën shanset e tij për të goditur tokën, por më pas i ulën sërish ato. Vlerësimi i fundit thotë se objekti ka një shans prej 0.28% për të goditur Tokën në vitin 2032, dukshëm më i ulët se shanset prej 3.1% në fillim të javës. Shkencëtarët thonë se tani ka më shumë gjasa që asteroidi të përplaset në Hënë, me NASA-n që vlerëson probabilitetin që kjo të ndodhë në 1%. Por që nga viti 2024, kur YR4 u vu re për herë të parë përmes një teleskopi në shkretëtirë, në Kili, e deri dy muaj më parë, dhjetëra objekte të tjera kanë kaluar më afër Tokës sesa Hëna, cka në terma astronomikë tingëllon si një kalim i afërt. Ka të ngjarë që të tjerë, megjithëse shumë më të vegjël, të na kenë goditur ose janë djegur në atmosferë, por kanë kaluar pa u vënë re. Kjo është historia e asteroidëve për të cilët nuk keni dëgjuar kurrë, afrimet, goditjet e munguara dhe goditjet direkte. Shumica dërrmuese në fakt janë të padëmshme. Por disa mbajnë të dhëna të vyera për zbulimin e mistereve në universin tonë. Asteroidët, janë pjesë shkëmbore të mbetura nga formimi i sistemit tonë diellor rreth 4.6 miliardë vjet më parë.