Situata me Covid 19 kohët e fundit është paraqitur e stabilizuar, ku humbjet e jetës pothuajse janë zeruar si dhe numri i rasteve të personave të infektuar ka pësuar rënie. Ministria e Shëndetësisë ka bërë me dije se në 24 orët e fundit sërish nuk është regjistruar asnjë viktimë. Gjithashtu po në harkun kohor të 24 orëve të fundit, janë kryer 2907 testime, nga të cilat janë regjistruar vetëm 7 raste të reja me koronavirus. Rastet e reja janë identifikuar në këto bashki: 3 raste në Devoll, 2 raste në Tiranë, 1 rast në Shkodër dhe 1 rast në Mirditë. Po në 24 orët e fundit janë shëruar 4 qytetarë, duke e çuar numrin e të shëruarve në 130 mijë e 033 që nga fillimi i epidemisë. Në Spitalin Infektiv po marrin trajtim spitalor të specializuar vetëm 3 pacientë. Ndërkohë, aktualisht vetëm 55 pacientë janë ende aktivë me Covid 19 në të gjithë vendin.