Dy arrestime janë kryer nga xhandarmëria e San Marinos pasditen e sotme. Një nënoficer në detyrë në departamentin e policisë dhe një shtetas 42 vjeçar, me iniciale J.B, me kombësi shqiptare dhe me banim në provincën e Riminit. Nënoficeri është arrestuar me akuzën e përdorimit të drogës ndërsa shqiptari me akuzën e tregtimit të lëndës narkotike. Sipas hetimeve të prokurorisë, nënoficeri përdorte drogë edhe gjatë orarit të punës, drogë që e merrte nga J.B., 42 vjeç, raportojnë mediat italiane. Në operacionin e policisë u angazhua njësia speciale dhe qeni antidrogë i policisë lokale të Komunës së Riçiones, duke bërë të mundur gjetjen e 32 gramëve kokainë dhe një peshore me precizion të lartë. Të dy të arrestuarit u dërguan në burgun Capuchin dhe janë në dispozicion të gjykatës.