Policia doganore ka goditur një tjetër rast të kondrabandës së mallrave në kufi, ku për pasojë tre persona janë vënë në pranga. Në kuadër të operacionit "Guda" u arrestuan në flagrancë shtetasit Krenar Boci, Jorgen Haska dhe Dritan Dervishaj. Ky i fundit ishte me detyrë doganier në pikën doganore Qafëbotë. Sipas njoftimit të policisë, këta persona u vunë në pranga pasi në aksin rrugor Qafë-Muzinë - Gjirokastër u konstatua automjeti I tyre tip furgon, brenda të cilit u gjetën 296 paketime me nënprodukte të qumështit, me peshë totale 4735 kg, pa dokumentacionin përkatës. Dritan Dervishaj, doganieri në këtë pikë kufitare, dyshohet se ka mundësuar kalimin e këtij malli pa kryer veprimet përkatëse. Efektivët bënë me dije se ata sekuestruan një sasi të konsiderueshme të nënprodukteve të qumështit si dhe automjeti tip furgon që këta shtetas përdorën për transportimin e mallit. Materialet në ngarkim të këtyre shtetasve i kaluan Prokurorisë pranë Gjykatës së Shkallës së Parë Gjirokastër për veprime të mëtejshme hetimore.