Është arrestuar me urdhër të SPAK në aeroportin e Rinasit, Jamarbër Malltezi, dhëndëri i ish-Kryeministrit Sali Berisha. Ndaj Malltezit gjykata e posaccme ka vendosur masën e sigurisë arrest me burg, pas kërkesës së dy prokurorëve të dosjes së privatizimit të ish-kompleksit Partizani, Arben Kraja dhe Enkeleda Millonai. Në të njëjtën dosje është marrë nën akuzë edhe Sali Berisha, ndaj të cilit GJKKO ka vendosur masën e sigurisë detyrim paraqitjeje dhe ndalim të daljes jashtë vendit. Jamarbër Malltezi akuzohet për pastrim parash dhe përfitimin e 9 kullave në kompleksin me 17 godina shumëkatëshe të ngritura në truallin që dikur ishte në pronësi të klubit të Partizanit. Ndërkohë, burimet pohojnë se ndaj Sali Berishës është ngritur akuza e shpërdorimit të detyrës në procedurën e privatizimit të këtij trualli. Padia në SPAK për këtë dosje është çuar nga Ministri i Brendshëm, Taulant Balla në kohën kur ishte kreu i grupit të Partisë Socialiste. Malltezi në atë kohë u thirr nga SPAK dhe u mor në pyetje për këtë çështje ndërsa duket se Prokuroria e Posaçme ka gjetur provat e mjaftueshme për të arrestuar dhëndrin e ish-kryeministrit, që rezulton të jetë një prej pronarëve kryesorë të pallateve që fshiu gjurmët e kompleksit Partizani. Bëhet fjalë për një pronë me rreth 10.000 m2, në një nga zonat më të lakmuara të Tiranës nga ndërtuesit. Ajo u privatizua në vitin 2008 me një vlerë prej vetrëm 100.000 dollarë, më pak se vlera e një apartementi që shitet në këtë zonë.