Grupi parlamentar i Partisë Demokratike deklaron se rasti i arrestimit të sekretares së përgjithshme të ministrisë së shëndetësisë nuk është as afera më e madhe korruptive në këtë institucion dhe as e vetmja. Deputetët demokratë thonë se korrupsioni sistematik në Ministrinë e Shëndetësisë nuk mund të kalojë në heshtje dhe nuk mund të kalojë pa përgjegjësi politike. Arrestimi në flagrancë i zyrtares më të lartë publike të Ministrisë së Shëndetësisë provon sesa i përhapur është korrupsioni në qeverinë e Edi Ramës, thuhet në deklaratë. Grupi parlamentar i PD-së akuzon SPAK se nuk i ka shërbyer interesit publik, duke sjellë si shembull denoncimin për tenderat sekretë gjatë kohës së pandemisë. PD thotë se është koha që SPAK të mos bëhet sërish mburojë e korrupsionit të nivelit më të lartë politik në Ministrinë e Shëndetësisë dhe të marrë nën hetim edhe ministren e shëndetësisë,Ogerta Manastirliu. ‘Zotërinj të SPAK-ut, mos bëni sikur nuk e dini këtë! Hetoni edhe Ogerta Manastirliun!’, thuhet në deklaratë. Deklarata mbyllet me kërkesën adresuar ministres Manastirliu për t’u dorëhequr.