Një 70 vjeçar është vënë në prangat e policisë, pas i është gjetur një sasi e konsiderueshme municioni luftarak dhe armësh. Si rezultat i kontrolleve dhe i patrullimeve në terren, me qëllim konstatimin dhe goditjen e mbajtjes pa leje të armëve, shërbimet e Stacionit të Policisë Manzë, kanë siguruar informacion se shtetasi S. B., posedonte në banesën e tij, në fshatin Likmetaj, disa armë të llojeve të ndryshme. Në bazë të këtyre informacioneve, Shërbimet e Stacionit të Policisë Manzë në bashkëpunim me shërbimet operacionale të Drejtorisë Vendore të Policisë Durrës, kanë ndërhyrë menjëherë në banesën e tij. Si rezultat i kontrolleve në ambientet e saj, kanë gjetur dhe kanë sekuestruar me cilësinë e provës materiale, 1 armë zjarri kallashnikov, pjesë armësh zjarri, 2 armë gjahu, 462 fishekë të këtyre armëve dhe 1 armë të ftohtë, thikë. Kallashnikovi u dërgua në Institutin e Policisë Shkencore, për të verifikuar nëse është përdorur apo jo, për ngjarje kriminale.