Ministri gjerman i Drejtësisë, Marco Buschmann, tha se dërgimi i tankeve dhe armatimeve të tjera të rënda në Ukrainë, sipas ligjit ndërkombëtar, nuk do të përbënte hyrje të Gjermanisë në luftë kundër Rusisë. Buschmann i tha gazetës Velt am Sonntag se ligji ndërkombëtar nuk thotë se dërgimi i armëve është hyrje në një luftë. Prandaj, nëse Ukraina “ushtron të drejtën e saj legjitime të vetëmbrojtjes, mbështetja përmes furnizimeve me armë nuk të shndërron në palë në luftë”, tha ai. Shumë politikanë gjermanë dhe qytetarë kanë debatuar se sa thellë duhet të përfshihet shteti në mbështetjen e Kievit me ndihma ushtarake, pasi Rusia nisi pushtimin e paprovokuar të Ukrainës. Shtetet perëndimore, të udhëhequra nga Shtetet e Bashkuara, kanë rritur dërgesat e armëve për forcat e Kievit, pas thirrjeve dëshpëruese të liderëve ukrainas.Vetë Gjermania i ka ofruar qindra miliona dollarë ndihmë humanitare Ukrainës.