Alain Orsoni, një ish-lider separatist korsikan dhe ish-president i klubit të futbollit AC Ajaccio, u vra me snajper të hënën, ndërsa merrte pjesë në funeralin e nënës së tij. Orsoni, 71 vjeç, u qëllua me një plumb të vetëm në gjoks rreth orës 16:30 pas shërbimit të varrimit, sipas autoriteteve. Prokurori i Ajaccio-s, Nicolas Septe, tha se e shtëna erdhi nga një distancë e gjatë, nga disa qindra metra larg. "Ai u qëllua në zemër me një të shtënë të vetme, një goditje në distancë të gjatë", tha Septe për shtypin francez. Roger Polge, prifti që drejtoi ceremoninë e varrimit, tha se dëgjoi një të shtënë dhe Orsoni ra i vdekur. Orsoni kishte udhëtuar nga Nikaragua, ku jetonte, për të marrë pjesë në funeralin e nënës së tij në fshatin e tij të lindjes rreth 30 kilometra në veri të Ajaccio-s. Zyra e Prokurorit Kombëtar Kundër Krimit të Organizuar, gjykata e re franceze që synon të trajtojë kryesisht çështjet e trafikimit të drogës, trafikimit të qenieve njerëzore, prostitucionit dhe grabitjes së armatosur, mori përsipër hetimin. Zyra po bashkëpunon me gjykatën e specializuar ndër-rajonale të Marsejës. Hetuesit hapën një hetim për vrasje nga banda të organizuara dhe shoqata kriminale. Orsoni u bë udhëheqës i Frontit Kombëtar të Çlirimit të Korsikës në vitet 1980 pasi vëllai i tij Guy, gjithashtu një militant separatist, u vra në 1983. Orsoni iku nga Korsika në vitin 1996 dhe jetoi 13 vjet në në Florida, Nikaragua dhe Spanjë, ku kishte interesa biznesi në lojërat e fatit. U kthye në Korsikë në vitin 2008 dhe u bë president i AC Ajaccios deri në 2024-ën. Djali i tij Guy, i lindur në vitin 1984, konsiderohet një figurë e shquar në krimin e organizuar të Korsikës.