29 shtatori është dita e fundit e aplikimeve për të gjithë ata që duan të jenë pjesë e Byrosë Kombëtare të Hetimit. Deri tani bëhet e ditur se janë aplikuar 310 persona, ndërsa të mërkurën komisioni i përbërë nga SPAK e BKH do të kalojë në filtër aplikimet. Ata që plotësojnë kushtet do të vazhdojnë garën. Gara për një vend në Byronë Kombëtare është hapur më 8 shtator, ku kërkohen që të “rekrutohen” 60 hetues specialë, për të qënë pjesë e strukturës së re hetimore. Për këto pozicone punë në BKH ka reaguar edhe ambasada amerikane në Tiranë, e cila ka bërë apel që çdokush që përmbush kriteret për hetuesit specialë të BKH të aplikojë. Ambasada theksoi është një mundësi e mirë për t’u bërë pjesë e një strukture të pavarur nga çdo ndikim i paligjshëm, i brendshëm apo i jashtëm. Pas plotësimit të të gjitha të dhënave, duhet të kalohet edhe testi i ushtrimeve fizike si edhe të verifikohet pastërtia e figurës. Pas gjithë këtij procesi 60 kandidatët do të marrin distinktivin, do të testohen në makinën e së vërtetës, pasi ta kalojnë edhe këtë procedurë ata do të trajnohen me agjentët e FBI- së në SHBA.