Gjykata e Apelit të Posaçëm ka përfunduar shqyrtimin gjyqësor për dosjen e inceneratorit të Fierit dhe caktoi datën 19 nëntor për shpalljen e vendimit. Avokatët e personave të dënuar kërkuan pafajësi për klientët e tyre. Në seancën e kësaj të mërkure nuk ishte i pranishëm asnjëri nga të akuzuarit. Në shkallën e parë, Gjykata e Posaçme shpalli të pafajshëm tre persona, Arben Dervishajn, Juli Imerajn dhe Arjola Kodrën. Vendimi i shkallës së parë u ankimua në Apel nga prokuroria e posaçme antikorrupsion, që kërkon dënimin e tyre. Shkalla e Parë ka dënuar me 10 vite burgim ish ministrin e Mjedisit, Lefter Koka, 4 vite për ish sekretarin e tij, Alqi Bllako dhe 3 deri në 11 vite burg për gjashtë persona të tjerë. Ndaj katër të tjerëve gjykata vendosi dënimin me shërbim prove. Të gjithë të dënuarit përfitojnë uljen e dënimit me një të tretën për shkak të gjykimit të shkurtuar.