Rivalët e mundshëm në zgjedhjet presidenciale amerikane, Nënpresidentja Kamala Harris dhe ish-Presidenti Donald Trump paraqitën pikëpamje të ndryshme për luftën në Gaza gjatë takimit që patën me Kryeministrin izraelit Benjamin Netanyahu. Sipas zërit të amerikës, kushdo prej dy kandidatëve që do të fitojë në zgjedhjet e 5 nëntorit do të sjellë ndryshim në marrëdhëniet SHBA-Izrael. “Nuk mund t’i kthejmë sytë nga ana tjetër përballë këtyre tragjedive. Nuk mund t’ia lejojmë vetes të mos reagojmë ndaj vuajtjeve dhe unë nuk do hesht”, tha Nënpresidentja Harris duke iu referuar numrit të lartë të viktimave që është shënuar si pasojë e konfliktit të armatosur. Teksa kërkoi që t’i jepet fund luftës, Harris u tregua shumë më e ashpër në kritikat ndaj mënyrës se si Izraeli i bën operacionet luftarake, krahasuar edhe me Presidentin Joe Biden. Por nga na tjeër ish-presidenti Trump tha se nëse do të rizgjidhet ai do ta mbyll shumë shpejt këtë luftë. “Nëse fitojmë, do të jetë shumë e thjeshtë. Do të zgjidhet e gjitha shumë shpejt. Nëse nuk fitojmë, do të përfundojmë me luftëra madhore në Lindjen e Mesme dhe ndoshta një luftë të tretë botërore”, tha ish-Presidenti Trump. Ai vuri në dukje politikat pro Izraelit gjatë mandatit të tij të parë, si ndërmjetësimi i marrëveshjes që normalizoi marrëdhëniet diplomatike të Izraelit me disa nga vendet fqinje arabe, si dhe njohjen e sovranitetit të Izraelit mbi Lartësitë e Golanit. Me dëshirën për të rifituar votuesit e zemëruar me mbështetjen e vendosur të Presidentit Biden për Izraelin, Nënpresidentja Harris mund të përpiqet për një përqasje më të balancuar.Por, kushdo që do të jetë fituesi në zgjedhje, do të sjellë një ripozicionim në marrëdhëniet SHBA-Izrael, me apo pa zotin Netanyahu në pushtet. Anketimet, sipas Zerit të Amerikës, tregojnë se është rritur numri i amerikanëve, në veçanti në radhët e demokratëve, që janë kundër përgjigjes ushtarake të Izraelit në Gazë.