Inspektorati i Mbrojtjes së Territorit reagoi pas arrestimit të dy punonjësve të këtij isntitucioni dhe shpalljes në kërkim të dy të tjerëve pasi ushtronin presion ndaj bizneseve për t’u marrë para me qëllim që të mos u prishin tendat. Përmes një reagimi për mediat, IMT sqaron se dënon këtë rast dhe se personat përgjegjës janë shkarkuar nga detyra. “Sjellje të tilla janë të papranueshme dhe IMT distancohet plotësisht nga këto veprime individuale. Ndaj personave të përfshirë janë marrë menjëherë të gjitha masat e nevojshme administrative, duke i shkarkuar nga detyra”, thekson IMT ndërsa “inkurajon organet ligjzbatuese për bashkëpunim të plotë dhe ndëshkimin e rastit sipas ligjit, si edhe inkurajon çdo qytetar të denoncojë raste të ngjashme, në mënyrë që të mos mbetet asnjë hije dyshimi mbi integritetin e institucionit dhe misionin e tij.” Aksioni u krye nga SPAK pas disa denocimeve të paraqitura nga ana e bizneseve që kishin rënë pre e shantazheve.