Aksidentet rrugore janë shndërruar një tjetër vrasës i shqiptarëve, të cilët për shkak të shpejtësisë së madhe, mos respektimit të rregullave të qarkullimit kanë shkaktuar 165 humbje jete gjatë vitit 2021. Autoambulancat e qendrës kombëtare të urgjencave, të cilat shkojnë në vendngjarje për të dhënë ndihmën e parë, raportojnë në kohë reale për numrin e aksidenteve, i cili mbetet i lartë. Nga të dhënat e deritanishme, nga janari deri në fund të nëntorit, janë 3212 aksidente, përfshirë edhe ato me motor dhe mjete të rënda. Por një tjetër problem është ndihma e shpejtë që nuk dimë ta japim, pasi për të ndihmuar të aksidentuarit nxitojmë që t’i trasportojmë ata menjëherë, por në fakt më shume i dëmtojmë, pasi një lëvizje e gabuar mund të shkaktojë paralizë të të aksidentuarve. Në Urgjencën Kombëtare vijojnë trajnimet e të gjithë personelit dhe grupeve që japin ndihmën e shpejtë, të cilët janë të pajisur me të gjitha mjetet e nevojshme.