Një aksident tragjik ka ndodhur në rrugën e Kombit në zonën e Rubikut, ku një familje nga Kosova është përplasur fatalisht. Kryefamiljari që drejtonte makinën është përplasur me një mjet të tonazhit të rëndë, duke shënuar një nga ngjarjet më të rënda rrugore të këtij fillim viti. Nga të dhënat e para rezulton se janë 4 viktima, ndërsa një tjetër pjesëtar i familjes ka mbetur i plagosur. Nuk dihet se cili person ka mundur të mbijetojë, por situata ka qenë e rëndë, edhe për shkak të mungesës së ndricimit dhe motit të keq nga reshjet e shiut. Policia me forcat zjarrfikëse në vendngjarje kanë dhënë ndihmën e parë, por bilanci ka qenë i rëndë. Ndërkohë një ekip ekspertësh ka kryer hetimet e para dhe rezulton se lëvizja e automjeteve jo brenda normave të qarkullimit, por edhe moti mendohet të jenë shkaqet e aksidentit të rëndë. Rruga e Kombit ditët e fundit ka pasur një shtim të patrullave të Policisë, por këto të fundit kanë qenë shumë larg nga vendi i aksidentit. Nisur nga ky rast, por edhe nga të tjerë që kryesisht ndodhin në këtë zonë për shkak të reshjeve janë rritur efektivët e policisë rrugore që patrullojnë.