Komisioni Qendror Zgjedhjeve i ka dërguar një kërkesë zyrare Drejtorisë së Përgjithshme te Gjendjes Civile, në lidhje me numrin e emigrantëve që kanë regjistruar adresën e përhershme jashtë vendit. Kërkesa KQZ bëhet 4 muaj para zgjedhjeve të përgjithshme parlamentare të 25 prillit dhe kur po punohet mbi mundësinë që emigrantët shqiptarë të mund të votojnë. Për të mundësuar këtë votim emigrantët duhet që të deklarojnë adresat e tyre. “Sipas Kodit Zgjedhor KQZ mbikëqyr procesin e hartimit të listave të zgjedhesve, administrimin e zonave të qendrave të votmit, lutemi na dërgoni numrin e shtetasve sipas qarqeve që kënë regjistruar pranë Regjistrit Kombëtar të Gjendjes Civile adresën e vendbanimit jashtë shqipërisë”, thuhet në shkresën e KQZ-së për Drejtorinë e Gjendjes Civile. Komisioneri Shtetëror i Zgjedhjeve, Ilirjan Celibashi ka ngritur grupin e punës lidhur me mundësinë e votimit të shqiptarëve që jetojnë jashtë. Vota e emigrantëve ka qenë një ndër pikat e pakta që ka bërë bashkë të gjitha palët në tryezën e Këshillit Politik, e përfshirë në marrëveshjen politike të “5 qershorit”, megjithatë në dorë iu la KQZ-së së re për të bërë të mundur zbatimin e saj. Një vendim i Qeverisë i pak kohëve më parë, i publikuar në fletoren zyrtare, i kërkon bashkëkombësve emigrantë të nisin vetëdeklarimet për adresat e tyre në portalin qeveritar e-Albania.