Një 44-vjeçare është arrestuar nga policia në Sarandë, pas kallëzimit të një shtetasje, e cila deklaroi se ishte shantazhuar dhe kërcënuar përmes rrjeteve sociale, me qëllim përfitimin e shumave të mëdha parash. Sipas hetimeve të zhvilluara nga Seksioni për Hetimin e Krimeve ndaj Pasurisë, nën drejtimin e Prokurorisë pranë Gjykatës së Sarandës, është ndaluar Zyhra Korra, e dyshuar për veprën penale “Shtërngim me anë të kanosjes ose dhunës për dhënie pasurie”. Nga hetimet paraprake rezulton se Korra i ka marrë fillimisht 5 mijë euro 39-vjeçares, duke e kërcënuar se do të publikonte apo do të digjte dokumentacionin e saj të parregullt grek, nëse nuk i jepte edhe 50 mijë euro të tjera. E shantazhuara, i ka dhënë shumën prej 5 mijë eurosh në fillim, por pas kërcënimeve të vazhdueshme vendosi ta denoncojë rastin në polici. Prokuroria ka nisur hetimet ndaj 44-vjeçares, ndërsa materialet janë referuar për veprime të mëtejshme ligjore.