Operacioni Forca e Ligjit u dërgoi kete te premte, formularin e deklarimit të pasurisë 4 personave të dënuar për trafik të lëndëve narkotike dhe prostitucion në vende të huaja. "Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve: Latif Gurguri banues në Fier, i dënuar në Zvicër për veprën penale “Trafikimi i lëndëve narkotike” Mikel Hyka banues në Fier, i dënuar në Itali për veprën penale “Trafikimi i lëndëve narkotike”; Klodian Thomaj banues në Lushnjë, i dënuar në Itali për veprën penale “Trafikimi i lëndëve narkotike”; Arben Shehaj banues në Lushnjë, i dënuar në Itali për veprën penale "Shfrytëzimi i prostitucionit". Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.