Prokuroria e Posaçme kundër Korrupsionit dhe Krimit të Organizuar ka goditur sërish organizatën kriminale të Çopjave në Elbasan, në lidhje me trafikun ndërkombëtar të kokainës nga vendet e Amerikës Latine drejt Europës. 16 urdhër arreste të reja janë lëshuar nga Gjyakata e Posacme me kërkesë të SPAK, 10 prej të cilave janë zbatuar, ndërsa 6 të tjera janë në kërkim. Në Shqipëri janë arrestuar 7 persona; Ervis Çela dhe vëllai i tij Ardian Çela, Petrit Lakatos, Renato Musa, Gert Çerma, Mariglen Kamami dhe Elidon Çela. Ndërsa Franc Çopja alias Franc Gegeli, është tashmë i arrestuar në Belgjikë. Kurse me masën detyrim paraqitje në vendin tonë janë Ditjon Pepa nga Elbasani dhe Kujtim Gjyla nga Lushnja. Mësohet se në kërkim janë Miklovan Mullai, Denis Daja, Vilson Pepa, Riza Çela, si dhe Fadil alias Julian Balla, ky i fundit President i klubit të futbollit Erzeni. Gjatë aksionit, SPAK iu ka sekuestruar këtyre personave 14 pasuri të llojeve të ndryshme me vlera disa miliona euro. Mes pasurive të sekuestruara është një resort në Xhafzotaj të Durrësit, që përfshin hotele, godina shërbimi, restorante dhe ambiente tregtare, si dhe një vilë dy katëshe në Dhërmi, me vlerë rreth 1 milion euro. Ky grup kriminal, sipas njoftimit zyrtar të SPAK të zbuluar nëpërmjet të dhënave të komunikimit të enkriptuara të platformës SkyECC ka tentuar të trafikojë në portet kryesore të BE rreth 17 ton kokainë. Organizata sipas SPAK kontrollonte në mënyrë të plotë zinxhirin e trafikut të kokainës.