Një fenomen po vihet re kohët e fundit dhe madje me një rritje thuajse në shifra të paparashikuara. Para vitit 2014, shumë juristë nuk linin “gur pa luajtur” dhe paguanin shuma të majme për të hyrë në sistemin e drejtësisë, ndërsa sot paradoksalisht ka fluks kërkesash për të dalë në pension. Anëtarët e Këshillit të Lartë Gjyqësor të ndarë për manovrën e gjyqtarëve për të dalë më herët në pension nga frika e vettingut e kanë ngritur si probleme një fakt të tillë, duke e konsiderur krejtësisht të pazakontë atë që po ndodh me njerëzit e Drejtësisë Shqiptare. Ka gjyqtarë që kanë lënë drejtësinë për të punuar në spitale private, kisha dhe universitete. Nëse deri në vitin 2014, sipas një raporti të ekspertëve që asistuan komisionin për Reformën në Drejtësi, paguheshin 200-300 mijë euro për t’u emëruar gjyqtar apo prokuror, gjatë dy viteve të fundit, po ndodh e kundërta, gjyqtarë dhe prokurorë po luftojnë për t’u larguar nga sistemi i Drejtësisë. Ky është efekti që ka prodhuar zbatimi i ligjit të Vetingut në drejtësinë shqiptare. Ndërsa ende nuk janë përballuar me Vetingun as 30 për qind e magjistratëve, numri i dorëheqjeve sa vjen e shtohet. Motivet janë nga më të ndryshmet, duke nisur që nga dalja në pension të parakohshëm, angazhimi në sektorin privat dhe deri tek përkeqësimi i shëndetit. Ka gjyqtarë që kanë lënë drejtësinë për të punuar në kompani private, kisha, universitete, apo edhe sipërmarrje që nuk kanë spefikisht lidhje me Drejtësinë, sikurse mund të jenë zyrat avokatore, apo noteriale.