Gjykata e Posaçme dënoi me tre vite e një muaj burgim ish kreun e Bashkisë së Himarës, Jorgo Goron, si dhe vendosi konfiskimin e 10 mijë metër katrorë toka në zonën e Himarës, që sipas vendimit të gjykatës, janë tjetërsuar përmes falsifikimit të dokumentacioneve. Goro u gje fajtor për shpërdorim detyre dhe mosdeklarim pasurie. Vepra penale shpërdorim detyre, sipas gjykatës është konsumuar në dy raste në tjetërsimin e pronave në bregdet. Ish kryebashkiaku i Himarës do të përfitojë nga gjykimi i shkurtuar, duke u dënuar në përfundim me 2 vite e 20 ditë burg. Gjykata ka dënuar me 2 vite burg Vezir Gjikokën dhe me 3 vite Jerasimo Bashon. Që të dy përfitojnë zbritje të një të tretës së dënimit për shkak të gjykimit të shkurtuar. Gjykata vendosi konfiskimin e 10 mijë metër katrorë tokë në zonën e Dhërmiut, mbi të cilën u dha edhe statusi i investitorit strategjik për biznesmenin Artan Gaçi, bashkëshorti i deputetes socialiste, Olta Xhaçka. Goro u shpall fajtor se ka firmosur dhe përcjellë te institucione të tjera dokumente të falsifikuara për pronat në fjalë pa kryer verifikime, duke çuar në regjistrimin e pronës shtet në favor të subjekteve private. Jorgo Goro u arrestua në mars të vitit të shkuar, ndërsa gjatë seancave gjyqësore i ka mohuar akuzat.