Policia ka rinisur kërkimet për tre të rinjtë e zhdukur që prej 3 tetorit në zonën e Vrithit në Malësinë e Madhe, ndonëse dyshimet të paktën deri tani bëjnë fjalë për dy viktima. Burime të Policisë bëjnë të ditur se kanë dalë disa detaje të reja për ngjarjen, pas hetimeve operative dhe mbajtjes nën përgjim të telefonatave të të zhdukurve, që prej ditës kur për ta është bërë denoncim nga familjarët. Bëhet fjalë për tre të rinjtë Vilson Cutaj dhe Klement e Danjel Pepaj. Policia ka marrë dëshmitë e disa banorëve të zonës, të cilët konfirmojnë se mes tyre ka pasur një konflikt dhe madje njëri është rrahur. Danjel Pepaj sipas burimeve është rrahur shumë nga shtetasit Vilson Çutaj dhe Klement Pepaj në Bajzë. Fillimisht Danjeli ka mohuar se është ai autori i vjedhjes së parcelave me kanabis por pas torturave është detyruar që të thotë po. Mësohet se Danjel Pepaj ka patur parcelën e tij me kanabis ndërsa Vilson Çutaj dhe Klement Pepaj dyshohet se kanë patur një parcele veçmas. Gjithsesi, Policia ka nisur kërkimet në zonën e thellë malore dhe me një terren të vështirë, prej nga rezultatet kanë qenë negative. Ndërkohë, janë kryer verifikime edhe në sistemin Tims për të parë kalimin e tij në Malin e Zi, por edhe këtu nuk rezulton që Danjel Pepaj të ketë kaluar kufirin. Dyshohet se ai ka kaluar territorin e Shqipërisë jo nga pika kufitare.