Senati amerikan i udhëhequr nga demokratët, miratoi të martën një paketë 95.34 miliardë dollarësh, ndihma për Ukrainën, Izraelin dhe Tajvanin, në mesin e dyshimeve për fatin e ligjit në dhomën e përfaqësuesve të kontrolluar nga republikanët. Ligjvënësit miratuan masën në një votim me 70 vota pro dhe 29 kundër, që kapërceu kufirin e nevojshëm dhe e përcolli ligjin në dhomën e përfaqësuesve. 22 republikanë iu bashkuan demokratëve në mbështetje të ligjit. “Sigurisht që kanë kaluar vite e ndoshta edhe dekada që kur senati ka miratuar një projektligj që ka kaq shumë pasoja jo vetëm në sigurinë tonë kombëtare dhe atë të aleatëve tanë, por edhe në sigurinë e demokracive perëndimore”, tha lideri i shumicës në senat, Chuck Schumer. Votimi në senat u mbajt në të aguar të ditës pasi tetë kundërshtarë republikanë të ndihmës për ukrainën, mbajtën një maratonë fjalimesh që dominuan në sallë për më shumë se gjashtë orë. Presidenti demokrat Joe Biden i ka kërkuar kongresit të nxitojë me ndihmat e reja për ukrainën dhe partnerët amerikanë në indo-paqësor, që përfshijnë edhe tajvanin. Pas sulmit të hamasit në izrael, më 7 tetor, ai kërkoi fonde edhe për aleatin e shba-së, bashkë me ndihma humanitare për palestinezët në gaza. Zyrtarët ukrainas kanë paralajmëruar ndërkohë për mungesë armatimesh e municionesh në një kohë kur rusia po vazhdon sulmet e saj mbi Ukrainë. Tani duhet që edhe dhoma e përfaqësuesve të miratojë projektligjin para se presidenti Biden ta kthejë atë në ligj.