Shtrëngimi i duarve në Shkup mes kryeministrit Edi Rama dhe homologut të tij maqedonas Dimitar Kovaçevski, u pasua me firmosjen e 21 marrëveshjeve bilaterale në fushën e energjisë, tregtisë, infrastrukturës dhe shëndetësisë. Në rrugëtimin e përbashkët drejt Bashkimit Europian, kryeministri Rama bëri thirrje që procesi i integrimit të mos mbahet peng nga politika e brendshme. Populli këtu është më i mençur se politikanët dhe nuk besoj se do ia fal kujt ligësinë e rimarrjes peng të Maqedonisë së Veriut, ndërkohë që kapërcimi është epokal. Procesi i Berlinit, është lokomotivë që ka tërhequr vagonët. Vendi ynë është në familjen e bashkuar europiane dhe ky afirmim ka ardhur falë pasionit, punës, rezultateve dhe vendosmërisë sonë për t’u martuar me hir ose me pahir me të dashurën tonë të përbashkët, Europën e bashkuar.