Të paktën 20 palestinezë u vranë të mërkurën në një qendër të shpërndarjes së ndihmave të drejtuar nga Fondacioni Humanitar i Gazës, në atë që grupi i mbështetur nga SHBA e quajti një tërbim të turmës, të nxitur nga agjitatorë të armatosur. Fondacioni humanitar për Gazën, që mbështetet nga Izraeli, tha se 19 persona u shkelën me këmbë dhe një u ther për vdekje gjatë përplasjes në një nga qendrat e tij në Khan Younis në Gazën jugore. "Kemi arsye për të besuar se elementë brenda turmës, të armatosur dhe të lidhur me Hamasin, nxitën qëllimisht trazirat," tha grupi në një deklaratë. Nuk ka pasur asnjë koment të menjëhershëm nga Hamasi. Zyrtarët palestinezë të shëndetësisë i thanë Reuters se 21 persona kishin vdekur në vendngjerje. Një mjek tha se shumë njerëz ishin ngjeshur në një hapësirë të vogël dhe ishin shtypur për vdekje. Të martën, zyra e të drejtave të njeriut e OKB-së në Gjenevë tha se kishte regjistruar të paktën 875 vrasje, brenda gjashtë javëve të fundit në afërsi të vendeve të ndarjes së ndihmës dhe autokolonave të ushqimit në Gaza, shumica e tyre afër pikave të shpërndarjes së Fondacionit Humanitar për Gazën. Shumica e këtyre vdekjeve u shkaktuan nga të shtënat me armë zjarri për të cilat vendasit kanë fajësuar ushtrinë izraelite. Ushtria ka pranuar se civilët palestinezë janë lënduar pranë qendrave të shpërndarjes së ndihmës, duke thënë se forcat tani kanë marrë udhëzime të reja ku reflektohen mësimet e nxjerra. Fondacioni humanitar për gazën përdor kompani private amerikane të sigurisë dhe logjistikës për të sjellë furnizime në Gaza, duke anashkaluar kryesisht një sistem të udhëhequr nga OKB-ja që Izraeli pretendon se i ka lejuar militantët e udhëhequr nga Hamasi të plaçkitin dërgesat e ndihmës të destinuara për civilët. Hamasi i mohon akuzët. OKB-ja e ka quajtur modelin e Fondacionit të pasigurt dhe një shkelje të standardeve të paanshmërisë humanitare, një akuzë që grupi e ka mohuar.