Prokuroria e Posaçme kërkoi 2.6 vite burg për Fredi Belerin për akuzën e korrupsionit zgjedhor, ndërsa për Pandeli Kokaveshin, të akuzuarin tjetër në të njëjtën dosje SPAK kërkoi dy vite burg, por që të pezullohet në shërbim prove për katër vite për shkak të gjendjes së tij shëndetësore. Prokurorët thanë në seancë se kanë arritur që të provojnë akuzën e ngritur ndaj Fredi Belerit për rastin e blerjes së votave para zgjedhjeve për Bashkinë e Himarës. Në dosjen e SPAK citohet dëshmia e Arsen Ramës, si edhe një audiopërgjim, sipas të cilit Beleri premtonte 40 mijë lekë të vjetra për tetë vota. Pala mbrojtëse pretendoi se as dëshmia dhe as audiopërgjimi nuk faktojnë se Fredi Beleri ka konsumuar vepra penale të shitblerjes së votës. Avokatët këmbëngulën se procesi është tërësisht politik.