Pesë muaj nga çelja e seancës paraprake, ish-presidenti Ilir Meta nën akuzë për korrupsion, pastrim parash dhe fshehje pasurie kërkoi pushim të çështjes për episodin Cez-Dia dhe kthim pas për hetime të mëtejshme për lobimin. Mbrojtja ndodhi pasi prokurori Sotir Kllapi ka kërkuar dërgimin për gjykim të ish-presidentit, por ish-funksionari këmbënguli në procesin me dyer të mbyllura se s’ka asnjë provë kundër tij. Një qëndrim i tillë u ripohua nga avokati Kujtim Cakrani që në një proces maratonë të tejzgjatur ku u renditën pretendimet dhe mangësitë hetimore, që vlerësoheshin si të qëllimshme kundër Metës. Në hetimet e SPAK të finalizuara gjatë verës konkludohet se Meta, si ish-ministër i Energjetikës, dyshohet se ka përdorur influencën për lidhjen e kontratës mes CEZ dhe DIA. Si ish-kryetar kuvendi, ai dhe ish-bashkëshortja Kryemadhi kanë ndikuar për futjen e fibrave optike, dhe po ashtu dyshohet për kontratat lobuese. Të gjitha këto rezultate kundërshtohen nga të pandehurit. Seanca u shty për të dëgjuar të pandehurit e tjerë, në çështjen ku Meta, Kryemadhi, Ema Çoku, Pirro Xhixho dhe Fatme Kryemadhi janë nën akuzë.