11 vatra zjarri janë ende aktive në vendin tonë, sipas të dhënave më të fundit nga qendra Kombëtare Operacionale e Emergjencave Civile. Prej 12 ditësh forcat operacionale dhe ato të armatosura, nuk po fikin dot zjarrin në vendin e quajtur “Liqeni i Luleve”, pjesë e Parkut Kombëtar Lurë bashkia Dibër. Në këtë zonë, janë dy vatra zjarri, njëra në drejtim të Lurës, ndërsa vatra tjetër po zhvillohet në pjesën e sipërme nga krahu i Gurë Lurës. Për shuarjen e flakëve janë angazhuar 30 forca nga organet vendore dhe 30 forca nga FA. Njësia administrative Shupenzë po lufton prej 6 ditësh, ndërsa flakët janë spostuar nga “Livadhi i Peladhisë”, njësia administrative Zerqan. Në terren ndodhen 9 efektivë me 1 automjet zjarrfikës dhe 4 forca nga Shërbimi Pyjor. Një tjetër vatër është aktive në fshatin Zall Gjoçaj, njësia administrative Derjan, bashkia Mat, teksa zjarri po zhvillohet edhe në fshatin Dovolan, njësia administrative Maqellarë, bashkia Dibër. Sipas njoftimit zyrtar që përcolli ministria e mbrojtjes, flakët janë afër disa banesave. Situatë e vështirë paraqitet edhe në fshatin Belishovë në Mallakastër, ku vatra e zjarrit ka marrë zgjerim të perimetrit. Në vendngjarje për shuarjen e tij po punojnë dhjetra forca zjarrfikëse. Intensiv është edhe zjarri në vendin e quajtur “Qafa e Shëngjergjit”, bashkia Vlorë, ku po digjen shkurre ndërsa era kanë përfshirë edhe kurorën e pishave. Vatra zjarri ka edhe në fshatin Shmil, bashkia Elbasan, fshatin Tenë bashkia Mirditë, në fshatin Zallë, bashkia Krujë si dhe në bashkinë Shijak afër Parkut të Kamionëve Pelikani në bimësi të ulët. Në këto zona, po punojnë forcat zjarrfikëse.