Qeveria e Australisë perëndimore ka ofruar 1 milionë dollarë australianë, ose 750 mijë dollarë amerikanë, si shpërblim për informacione që do të conin në zbulimin e vendndodhjes së një 4 vjecareje të zhdukur prej gjashtë ditësh tashmë, në një zonë të largët bregdetare. Cleo Smith u zhduk nga tenda e familjes së saj në një kamping në Macleod, rreth 50 km në veri të qytezës Karnarvon, orët e para të mëngjesit të së shtunës. Që atëherë, ekipet e kërkimit kanë filtruar terrene të vështira dhe bregdetin por nuk kanë gjetur ende asnjë shenjë të fëmijës, e madje as dyshekun e kampingut me të cilin ajo ishte rrëmbyer. Policia ka shprehur shqetësim për sigurinë e vogëlushes ndërkohë që beson se zinxhiri që hapte tendën, ishte shumë i lartë që ajo ta arrinte.