Presidenti i Rusisë, Vladimir Putin, dhe presidenti amerikan, Donald Trump, kanë zhvilluar të enjten një bisedë telefonike, të gjashtën me radhë që nga fillimi i këtij viti. Sipas ndihmësit të Kremlinit, Yuri Ushakov, gjatë kësaj bisede të fundit, të dy liderët kanë shprehur vullnetin për të gjetur një zgjidhje të negociuar për konfliktin në Ukrainë. Megjithatë, Putin ka theksuar se qëndrimi i Rusisë mbetet i pandryshuar dhe se Moska është e përkushtuar për të realizuar “eliminimin e shkaqeve rrënjësore të konfliktit”. Ai ka nënvizuar se Rusia nuk do të tërhiqet nga plani i saj, pavarësisht zhvillimeve të fundit. Kremlini e ka bërë të qartë se çdo përpjekje për paqe duhet të kalojë vetëm përmes dialogut të drejtpërdrejtë mes Moskës dhe Kievit, duke refuzuar ndërmjetësimin nga palë të treta. Ndërkohë, nuk është raportuar ndonjë diskutim konkret lidhur me ndalimin e dërgesave të armëve nga Shtetet e Bashkuara drejt Ukrainës, çështje që ka qenë shpesh në qendër të debateve në Uashington dhe kancelaritë europiane. Gjatë bisedës, Putin dhe Trump kanë trajtuar gjithashtu zhvillimet në Lindjen e Mesme, me fokus të veçantë situatën në Iran dhe ndikimin që ajo ka në stabilitetin e rajonit më të gjerë. Në fund të bisedës telefonike, të dy liderët janë shprehur të hapur për të vazhduar diskutimet në një të ardhme të afërt.