Të paktën 4 persona mbetën të vrarë dhe 14 të tjerë u plagosën nga të shtënat me armë zjarri jashtë një klubi nate në Çikago të Shteteve të Bashkuara. Policia e Çikagos tha se një makinë me ngjyrë të errët kaloi pranë klubit në orët e para të mëngjesit, kur persona të armatosur brenda automjetit hapën zjarr ndaj një turme njerëzish. Sipas policisë, njerëzit po largoheshin nga klubi i natës pas një feste për publikimin e albumit të reperes Mello Buckzz, kur u qëlluan me breshëri plumbash nga mjeti në lëvizje, që u largua menjëherë nga vendi i ngjarjes dhe deri më tani nuk ka asnjë të arrestuar. Të plagosurit u dërguan me urgjencë në disa spitale të zonës, por dy djem 24 dhe 25 vjeç, dhe dy vajza 26 e 27 vjeç, ndërruan jetë nga plagët e marra. Ndërkohë, raportohet se katër nga të plagosurit janë në gjendje të rëndë në spital. Dëshmitarët përshkuan momentet e tmerrit, duke thënë se ishte një skenë kaosi e pashoq dhe që nuk ishte parë kurrë më parë. Pas ngjarjes tragjike, reperja Mello Buckzz reagoi e tronditur, duke thënë se “ndihem sikur gjithçka po më rëndon, e gjitha çfarë mund të bëj është të flasë me Zotin dhe të lutet".