Presidenti i Ukrainës, Volodymyr Zelensky, dhe ai i Shteteve të Bashkuara të Amerikës, Donald Trump, po zhvillojnë takimin e tyre të tretë brenda këtij viti. Dy liderët janë takuar në Florida për raundin e fundit të bisedimeve, që synojnë t'i japin fund luftës me Rusinë. Takimi po zhvillohet në shtëpinë e Trump, në Mar-a-Lago, ku në tryezë është versioni i përditësuar i planit të paqes, ndërmjetësuar nga SHBA, të cilin Moska ende nuk e ka mbështetur, si dhe propozime të veçanta për garancitë e sigurisë nga SHBA. Presidenti ukrainas ka shprehur optimizëm në lidhje me draftin e ri të planit të paqes, duke e përshkruar atë si "një dokument themelor për përfundimin e luftës". Të premten, ai u tha gazetarëve se plani 20-pikësh ishte 90% i përfunduar: "Detyra jonë është të sigurohemi që gjithçka është 100% gati." Ndërkohë, pak para takimit me Zelenskyn, Presidenti Trump zhvilloi një bisedë telefonike me homologun rus, Vladimir Putin, për planin e paqes në Ukrainë. Vetë Trump e cilësoi bisedën me udhëheqësin e Kremlinit si shumë produktive. Nga ana tjetër, edhe Zelensky, para se të niste takimin me Trump, telefonoi kryeministrin britanik, Keir Starmer, me të cilin zhvilloi një bisedë te detajuar mbi zhvillimet diplomatike dhe ushtarake. Duke vlerësuar mbështetjen e vazhdueshme të Mbretërisë së Bashkuar, Zelensky tha se ka informuar kryeministrin Starmer për situatën në front dhe pasojat e sulmeve të fundit ruse në Ukrainë. Takimi mes Trump e Zelenskyt vjen pas bombardimeve intensive ruse të Kievit gjatë fundjavës, të cilat presidenti ukrainas tha se janë dëshmi se Moska "nuk dëshiron paqe". Autoritetet lokale thanë se breshëria 10-orëshe me raketa dhe dronë që synonin kryeqytetin e Ukrainës vrau dy persona dhe la 32 të tjerë të plagosur.