Presidenti i Serbisë, Aleksandar Vuçiç, në fjalimin para kombit të martën në mbrëmje ka thënë se do të nisë menjëherë konsultimet me partitë politike për të biseduar nëse do të formohet një qeveri e re brenda 30 ditësh, siç e parashikon ligji, apo do të shpallen zgjedhjet e reja, pas dorëheqjes së Millosh Vuçeviçit nga posti i kryeministrit të vendit. "Jam i hapur për të dyja opsionet. Mund të kemi zgjedhje pas 75 ditësh dhe muaji prill është më i mundshmi. Nuk do të ketë qeveri të përkohshme", ka thënë ai, duke shtuar se detyra kryesore e autoriteteve tani është ruajtja e stabilitetit. Presidenti serb ka thënë se ka e pasur shumë të vështirë që të pranojë dorëheqjen e Vuçeviçit. “Ai e bënte mirë punën e tij, rriti ekonominë dhe punoi me shumë dashuri për Serbinë. Por në situatën ku jemi, duheshin marrë përgjegjësi politike”, theksoi Vuçiç. Millosh Vuçeviç dha dorëheqjen paraditen e së martës, në valë e sipër të protestave për incidentin në Novi Sad, në nëntor të vitit të kaluar, ku si pasojë e shembjes së një pllake të madhe betoni janë vrarë 15 persona. Për më shumë se dy muaj në Serbi, mijëra studentë dhe qytetarë të tjerë kërkojnë përgjegjësi penale dhe politike për tragjedinë e ndodhur. Edhe pas vendimit të Vuçeviçit për dorëheqje, përfaqësuesit e studentëve në Serbi kanë thënë se kërkesat e tyre nuk janë plotësuar dhe kanë paralajmëruar protesta të reja. Presidenti serb e di se dorëheqja e kryeministrit mund të mos i ndalë protestat dhe ka thënë se ato i kanë shkaktuar dëme të mëdha ekonomisë së Serbisë dhe sektorit të investimeve. Vuçiç ka pretenduar se organizimi është bërë sipas “urdhrit nga jashtë”, por pa përmendur dikë në mënyrë specifike. Nga ana tjetër, lëvizja e studentëve nuk ka liderë. Ata i marrin vendimet me shumicë votash.