Aleksandar Vuçic njoftoi se zgjedhjet e parakohshme parlamentare në Serbi do të mbahen në muajin tetor. Kreu i shtetit serb sqaroi se votimet mund të zhvillohen më 18 ose 25 tetor, më shumë se një vit para përfundimit të mandatit të rregullt. Njoftimin ai e bëri gjatë gjatë një interviste për televizionin publik serb RTS. Në fund të qershorit, gjatë një aktiviteti të partisë së tij në Beograd, Vuçic qe shprehur se synon të largohet nga posti i presidentit në të ardhmen e afërt. Ndërkohë, në Serbi kanë qarkulluar spekulime se ai mund të rikthehet në postin e kryeministrit, të cilin e ka mbajtur nga viti 2014 deri në vitin 2017, përpara se të zgjidhej president. Nëse zgjedhjet mbahen në tetor, ato do të zhvillohen dukshëm më herët se afati i rregullt parlamentar. Zgjedhjet e parakohshme janë një nga kërkesat kryesore të protestuesve, të cilët prej më shumë se një viti e gjysmë po zhvillojnë protesta në Serbi kundër qeverisë dhe korrupsionit. Njoftimi për zgjedhjet e parakohshme vjen pikerisht pas më shumë se një viti protestash, të udhëhequra kryesisht nga studentët dhe të nxitura nga tragjedia e nëntorit 2024, kur shembja e tendës së një stacioni hekurudhor në Novi Sad shkaktoi vdekjen e 16 personave. Protestuesit kanë kërkuar që përgjegjësit për tragjedinë të përballen me drejtësinë, si dhe kanë bërë thirrje për luftë kundër korrupsionit dhe ndryshime politike. Ndërkohë, opozita dhe kritikët e qeverisë e kanë akuzuar presidentin Vuçic dhe aleatët e tij për korrupsion, presion ndaj kundërshtarëve politikë dhe kufizim të lirisë së medias, akuza te cilat ai dhe mbeshtetesit e tij kane vijuar t`i hedhin poshtë.