Një ngjarje e rëndë ndodhi në qytetin e Vlorës mbrëmjen e së premtes, kur një nënë, e cila ishte nën efektin e alkoolit, ka përplasur foshnjën e saj 5 muajsh në tokë. Ngjarja ka ndodhur në lagjen “Pavarësia”, ku një grua rreth 35 vjeç, në gjendje të dehur, ka vepruar në mënyrë të dhunshme ndaj fëmijës së saj, duke e përplasur disa herë në trotuar. Kalimtarë të rastit njoftuan policinë, duke mundësuar ndërhyrjen e shpejtë të forcave të rendit. Uniformat blu kanë mbërritur menjëherë dhe kanë marrë fëmijën në duar, ndërkohë që nëna ka kundërshtuar me forcë autoritetet. Pas përpjekjeve për ta ndaluar, ajo është prangosur dhe është shoqëruar në komisariat për t’u marrë në pyetje. Foshnja është transportuar menjëherë në spital, ku është kontrolluar nga mjekët. Sipas njoftimit të policisë, në pjesët e jashtme të trupit të fëmijës nuk janë konstatuar dëmtime të rënda, por për t’u siguruar për ndonjë dëmtim të mundshëm, është kryer një skaner për të kontrolluar organet e brendshme. Ndërkohë, nëna, e divorcuar është marrë në pyetje nga policia për të sqaruar rrethanat e ngjarjes.