Donald Trump mbërrin në Mbretërinë e Bashkuar mes kritikave të ashpra nga kryebashkiaku i Londrës Sadiq Khan dhe tensioneve politike për Starmer. Presidenti Donald Trump ka mbërritur në Mbretërinë e Bashkuar të martën në mbrëmje, në një vizitë shtetërore të shumëdiskutuar, teksa përballet me kritika të forta nga kryebashkiaku i Londrës, Sadiq Khan. Khan e ka akuzuar presidentin amerikan se është ndër figurat kyçe që kanë nxitur të djathtën ekstreme dhe politikën përçarëse në mbarë botën. Në një artikull për The Guardian, Khan theksoi se edhe pse e kupton rëndësinë e lidhjeve me SHBA-në, kjo nuk duhet të pengojë kritikën ndaj një udhëheqësi që ka nxitur ndarjet, frikën dhe urrejtjen. Ai deklaroi: “Veprimet e presidentit, si përdorimi i ushtrisë në qytete apo deportimi i njerëzve pa një proces të rregullt ligjor, nuk janë thjesht kundër vlerave perëndimore – ato janë veprime drejtpërdrejt nga libri i lojërave të një autokrati.” Khan, i cili u përplas me Trump edhe gjatë vizitës së tij të parë shtetërore në vitin 2019, kritikoi gjithashtu heshtjen e politikanëve dhe mediave britanike përballë rritjes së ekstremizmit. “Skenat që pamë këtë fundjavë në protestën e udhëhequr nga Tommy Robinson nuk erdhën nga hiçi. Për shumë kohë, politikanët tanë kanë dështuar të dënojnë urrejtjen në rritje. Heshtja nuk është më e pranueshme – ka ardhur koha të ngrihemi dhe të themi: kjo nuk është ajo që jemi.” Në një sfidë të drejtpërdrejtë ndaj qeverisë së Keir Starmer për qëndrimin e saj ndaj Trump, Khan deklaroi se veprimet e presidentit amerikan – përfshirë përdorimin e ushtrisë në qytetet amerikane dhe shënjestrimin e pakicave – janë “drejtpërdrejt nga manuali i një autokrati”. Sipas gazetës The Guardian, një plan për të njoftuar një marrëveshje që do të eliminonte tarifat mbi çelikun dhe aluminin britanik në SHBA ka dështuar në minutën e fundit, duke i shkaktuar një tjetër pengesë qeverisë britanike në përpjekjet për të paraqitur marrëdhënie të forta me Uashingtonin. Starmer, i cili e ka mbrojtur më parë qasjen e tij më të kujdesshme ndaj Trump duke përmendur ruajtjen e lidhjeve tregtare, pritet të përballet me kritika për pritjen që i ka rezervuar presidentit amerikan, përfshirë një vizitë shtetërore të dytë – një lëvizje e paprecedentë për një president amerikan. Trump pritet të kalojë të mërkurën me mbretin Charles, mbretëreshën dhe anëtarë të tjerë të familjes mbretërore në Kështjellën Windsor. Axhenda përfshin një tur, një fluturim ushtarak dhe një banket zyrtar. Të enjten, Trump do të takohet me kryeministrin Starmer në Chequers, rezidencën kryeministrore në fshat.