Raportet e vajzave dhe grave të reja të sulmuara brutalisht nga anëtarët e familjes së tyre kanë mbushur së fundi titujt e lajmeve në Indi. Incidentet gjithashtu kanë vënë në qendër të vëmendjes faktin sesa të pasigurta janë femrat edhe brenda shtëpisë në këtë vend. Javën e kaluar, 17-vjeçarja Neha Paswan dyshohet se është rrahur për vdekje nga anëtarët e familjes së saj në shtetin verior të Uttar Pradesh. Faji i vetëm i adoleshentes ishte se i pëlqente të vishte xhinse. Nëna e saj, Shakuntala Devi Paswan, i tha BBC-së se adoleshentja ishte rrahur me shkopinj nga gjyshi dhe xhaxhallarët e saj deri sa kishte dhënë shpirt pas një zënke që shpërtheu lidhur me rrobat që kishte veshur. “Atë ditë, kishte mbajtur agjërim. Në mbrëmje veshi një palë xhinse dhe kreu ritualet e saj. Kur gjyshërit dhe xhaxhallarët e kundërshtuan veshjen e saj, Neha u përgjigj se xhinset ishin bërë për t'u veshur dhe do ta vishte ", tha nëna e tronditur, që shton se sherri u përshkllëzua duke përfunduar në dhunë të skajshme. Katër persona kanë përfunduar në pranga për ngjarjen e rëndë, ndërsa disa të dyshuar të tjerë janë shpallur në kërkim.