Të paktën një person mbeti i vrarë dhe 16 të tjerë u plagosën si pasojë e sulmeve ruse ndaj Ukrainës këtë të enjte, njoftuan zyrtarët vendas, ndërsa Kievi shënoi 32 vjetorin e pavarësisë nga Moska. Sulmet ku mbetën të plagosur civilët u kryen në qytetet Kherson dhe Dnipro dhe në një qytet që ndodhet në vijën e frontit. Një grua u vra nga sulmet në Kherson, ndërsa mes tre të plagosurve ishte edhe një fëmijë. Dhjetë persona të tjerë u plagosën në qendër të qytetit të Dnipros, ndërsa autoritetet shtuan gjithashtu se nga sulmet u dëmtuan më shumë se 10 ndërtesa duke përfshirë një bankë, një hotel dhe një ndërtesë administrative. Tre banorë u plagosën në një tjetër sulm ndaj një supermarketi në lindje të rajonit të Doneskut, njoftoi prokurori i rajonit. Një vajzë shtatë vjeçare u plagos si pasojë e sulmeve ruse në qendër të Khersonit, tha guvernatori rajonal Oleksandr Prokudin. Zyra e prokurorit të përgjithshëm të Ukrainës tha se dy persona të tjerë u plagosën si pasojë e një predhe që goditi çatinë e një shtëpie private dhe postoi në internet një fotografi që tregonte një ndërtesë pjesërisht të shkatërruar. Rusia ka kryer rregullisht sulme në qytetet ukrainase larg vijës së frontit, megjithëse mohon që sulmet të kenë pasur qëllimisht si objektiv civilët. E enjtja përkoi me festën kombëtare të Ukrainës, ndërsa ky përvjetor përkoi ekzaktësisht me 18 mujorin e nisjes së agresionit rus ndaj Ukrainës. Në një fjalim të regjistruar paraprakisht, Presidenti Volodymyr Zelenskyy falënderoi popullin ukrainas që nuk u dorëzua dhe nuk u gjunjëzua dhe falenderoi çdo qytetar për rolin që kishte luajtur për ta bërë Ukrainën të pamposhtur. Pamjet: AFP