Dy javë pasi u qëllua me katër plumba, njëri nga të cilët i përshkroi stomakun e përfundoi në koma të induktuar, kryeministri sllovak Robert Fico ka dalë nga spitali, e nga sa pohon agjencia e lajmeve Reuters, tani mund të nisë rehalibitimin në shtëpi. Mjekët konfirmuan se ekzaminimet treguan përmirësim të gjendjes së tij shëndetësore mjaftueshëm sa për ta lejuar të kthehet në banesën e tij në Bratislavë. As spitali, dhe as zyrtarë të qeverisë nuk iu përgjigjën kërkesave për koment. Kreu i ekzekutivit sllovak u sulmua nga afër gjatë një takimi elektoral në qytetin e Handlovës në 15 maj. Njeriu që kreu atentatin ndaj jetës së tij, u identifikua si 71 vjecari Juraj Cintula, ish-punonjës sigurie në një qendër tregtare dhe autor i tre librave me poezi. Ai u ndalua menjëherë nga forcat e rendit e u akuzua për tentativë vrasjeje me paramendim. Sulmi ndaj kryeministrit 59 vjecar ngriti alarmin mbi polarizimin politik në Sllovakinë anëtare të NATO-s dhe të Bashkimit Europian, por tërhoqi vëmendjen për thellimin e këtij fenomeni edhe më gjerë në Europë. Atentati ndaj Ficos ishte përpjekja e parë për të vrarë një udhëheqës evropian në 20 vitet e fundit. Sulmi u dënua gjerësisht nga udhëheqësit ndërkombëtarë.