Vendimi i fundit i Rexhep Tajip Erdogan shkakton tensione të reja në Egje, shkruajne mediat greke. Sipas tyre, marina turke njoftoi përmes një NAVTEX-i përdoruesit e linjave detare në ishujt grekë mbi nisjen e një anijeje të saj në zonë për kërkime hidrografike. Anija “TSG Çesme”, do të operojë në një zonë të gjerë pranë ishujve grekë deri në 14 qershor. Përmes NAVTEX-it, Turqia paralajmëron anijet e tjera që të bëjnë kujdes kur kalojnë në zonë pasi edhe turqit ndodhen aty. Anija do të pozicionohet mes ishujve Lesvos-Skyros-Ai Strati. Kjo lëvizje është konsideruar menjëherë nga grekët si provokim i turqve, të cilët pak ditë më parë angazhuan edhe anijen tjetër “Yunus”. Ministri i Jashtëm grek, Nikos Dendias në një prononcim për gazetën “ta NEA” u bën thirrje aleatëve që të mos dorëzohen para shantazheve të Turqisë dhe duke iu referuar marrëdhënieve greko-turke theksoi se “jemi dëshmitarë të përshkallëzimit të retorikës agresive të Turqisë ndaj të drejtave sovrane të vendit tonë. “Duhet të reagojmë me maturi dhe gjakftohtësi. Të mos rrëmbehemi nga retorika ekstreme nga përtej Egjeut. Ne zgjedhim mënyrën dhe kohën që do të përgjigjemi. Është e qartë se agresioni turk nuk kufizohet vetëm në vendin tonë", tha Dendias. Tensionet mes dy vendeve u përshkallëzuan ndjeshëm verën e vitit 2020-tën, kur ato rrezikuan të shkonin drejt një konflikti të armatosur.