Presidenti i zgjedhur i Shteteve të Bashkuara të Amerikës, Donald Trump pritet të takohet nesër me republikanët e Dhomës së Përfaqësuesve. Kryetari i Dhomës së Përfaqësuesve, Mike Johnson, tha se Trump do të vizitojë Capitol Hill përpara takimit të tij me Presidentin Joe Biden në Shtëpinë e Bardhë. Po ashtu, Johnson tregoi se do të vizitojë Trump në Mar-a-Lago në Florida gjatë kësaj jave për të diskutuar planet për Kongresin e ri në janar, teksa foli për rëndësinë e arritjes së një Kongresi të unifikuar. “Amerikanët na kanë dhënë një mandat të qartë për të ofruar uljen e kostove, rritjen e ekonomisë, sigurimin e kufijve dhe rivendosjen e dominimit të energjisë”, tha ai, duke shtuar se këtë herë janë më të përgatitur se sa në vitin 2016. Ndërkohë, të mërkurën, Donald Trump do të takohet edhe me Presidentin Joe Biden në Shtëpinë e Bardhë. Ky do të jetë takimi i tyre i parë zyrtar që kur Trump fitoi zgjedhjet presidenciale të vitit 2024.