Zyrtarë të lartë të Pentagonit kanë mbërritur në Kiev për të "diskutuar përpjekjet për t'i dhënë fund luftës" me Rusinë, e pohuar kjo nga ushtria amerikane që sqaroi se ekipi, i udhëhequr nga Sekretari i saj, Dan Driscoll, pritet të takohet me Presidentin ukrainas Volodymyr Zelensky kur ai të kthehet nga udhëtimi në Turqi. Lajmi mbërrin një ditë pas raporteve se SHBA-ja dhe Rusia kanë përgatitur një plan të ri paqeje, i cili parashikon lëshime të mëdha nga Ukraina, por që zyrtarisht nuk është konfirmuar as Uashingtoni, e as nga Moska. Ai erdhi po kështu pas njoftimeve se Rusia kishte ndërmarrë njërin prej sulmeve më të egra ndaj vendit fqinj që prej nisjes së pushtimit të tij shkurtin e vitit 2022. "Sekretari Driscoll dhe ekipi i tij mbërritën këtë mëngjes në Kiev në emër të administratës amerikane, në një mision faktmbledhës gjatë të cilit do të takohen me zyrtarë ukrainas dhe do të diskutojnë përpjekjet për t'i dhënë fund luftës", theksoi zëdhënësi i Ushtrisë, Kolonel David Butler. Driscoll dhe Gjenerali Randy George, komandanti i ushtrisë amerikane në Europë, janë zyrtarët më të lartë ushtarakë amerikanë që zhvillojnë bisedime në kryeqytetin ukrainas që kur Presidenti Donald Trump mori detyrën në janar. Duke cituar burime që kanë dijeni për cështjen, Axios, Financial Times dhe Reuters raportuan se planet kërkojnë që Ukraina të tërhiqet plotësisht nga rajonet e kontestuara të Donetskut dhe Luhanskut dhe të pranojë kufizime si zvogëlimin e ushtrisë së saj. I dërguari special i Trump, Steve Witkoff, dhe i dërguari i udhëheqësit rus Vladimir Putin, Kirill Dmitriev, besohet se kanë qenë të përfshirë në punën për hartimin e planit 28 pikësh të paqes.