Presidenti amerikan, Donald Trump, paralajmëroi se do të godasë sërish Iranin, nëse nuk arrijnë një marrëveshje për t’i dhënë fund luftës deri në fund të javës. Në një konferencë me gazetarët nga Shtëpia e Bardhë, presidenti Trump deklaroi se Shtetet e Bashkuara mund të kenë nevojë ta godasin përsëri Iranin dhe se ai ishte vetëm një orë larg vendimit për një sulm, përpara se ta shtynte. “Isha një orë larg vendimit për të rifilluar bombardimet, por negociatorët më raportuan për përparim në bisedime. E kisha marrë vendimin, por ata më telefonuan. Ata kishin dëgjuar që mora vendimin. Ata thanë, zotëri, a mund të na jepni disa ditë më shumë, sepse mendojmë se po tregohen të arsyeshëm? Po u jap 2 ose 3 ditë, ndoshta deri në fillim të javës tjetër, sepse nuk mund t'i lejojmë ata të kenë një armë të re bërthamore”. Kreu i Shtëpisë së Bardhë tha gjithashtu se udhëheqësit e Iranit po luten të bëjnë një marrëveshje. Por nga ana tjetër, edhe Teherani u përgjigj me kërcënim, teksa paralajmëroi se do të “hapë fronte të reja” kundër Shteteve të Bashkuara, nëse rifillojnë sulmet. "Nëse armiku është aq budalla sa të bjerë përsëri në kurthin sionist dhe të nisë agresion të ri kundër Iranit tonë të dashur, ne do të hapim fronte të reja kundër tij, me pajisje dhe metoda të reja", tha zëdhënësi i ushtrisë iraniane. Ndwrsa ministri i Jashtëm i Iranit, Abbas Araghchi, i quajti të tepërta dhe kontradiktore sjelljet e Uashingtonit, dhe sipas tij, një pengesë serioze për demokracinë.