Në Shtetet e Bashkuara të Amerikës, dy anëtarë të Gardës Kombëtare u qëlluan me armë zjarri pranë Shtëpisë së Bardhë. Lajmi u konfirmua nga drejtori i FBI-së, Kash Patel. Ata u përfshinë në një shkëmbim zjarri me autorin e dyshuar para se të qëlloheshin. Agresori u plagos dhe nën shoqërimin e policisë u dërgua në spital, ndërsa vendi i ngjarjes është siguruar, thonë autoritetet. Drejtori i FBI dhe prokurorja e përgjithshme dënuan aktin, ndërsa mbërritën në vendngjarje, së bashku me agjentë të tjerë federalë, për të ndihmuar në hetime. Presidenti Donald Trump përdori një gjuhë të ashpër për ngjarjen: "Kafsha që qëlloi dy ushtarët e Gardës Kombëtare, të dy të plagosur rëndë dhe tani në dy spitale të ndara, gjithashtu është i plagosur rëndë, por sidoqoftë, do të paguajë një çmim shumë të lartë", shkroi presidenti në rrjetin social Truth Social. "Zoti e bekoftë Gardën tonë të Madhe Kombëtare dhe të gjithë ushtrinë dhe forcat e rendit." Sekretari i Mbrojtjes Pete Hegseth thotë se Presidenti Trump i ka kërkuar të dërgojë 500 trupa shtesë të Gardës Kombëtare në Uashington DC. Duke folur për gazetarët, Hegseth thotë se do t'ia paraqesë kërkesën Sekretarit të Ushtrisë. "Kjo vetëm sa do ta forcojë vendosmërinë tonë për ta bërë Uashington DC të sigurt", thotë Hegseth. "Nëse kriminelët duan të kryejnë gjëra të tilla, ne nuk do të tërhiqemi kurrë. Presidenti Trump nuk do të tërhiqet kurrë", u shpreh sekretari amerikan i mbrojtjes.