Një shpërthim ka tronditur mbrëmjen e së hënës lagjen nr. 4 të qytetit bregdetar të Durrësit, ndërsa kamerat e sigurisë në zonë, pamjet e të cilave janë siguruar nga TCH, kanë fiksuar personin e dyshuar si autor të vendosjes së lëndës plasëse. I veshur me të zeza dhe kapele e me kokë ulur ai shfaqet, 7-8 minuta para shpërthimit, me një qese në dorë, dhe më pas pa të. Policia po punon për identifikimin dhe kapjen e autorit të kësaj ngjarjeje kriminale që ka cenuar sigurinë në komunitet. Lënda plasëse që dyshohet të jetë e llojit tritol u vendos në pjesën e jashtme të dritares së banesës së Ilir Kociljas, 35-vjecarit të arrestuar, i cili ditën e Shën Valentinit vrau me thikë fqinjin e tij Halil Koka. Pas arrestimit të Kociljas, banesa është e mbyllur dhe në të nuk jeton askush, pasi familjarët e tij jetojnë jashtë vendit, sic pati deklaruar vetë Kocilja gjatë seancës për caktimin e masës së sigurisë në gjykatë. Nga shpërthimi janë shkaktuar vetëm dëme materiale, ndërsa banorët e lagjes janë tronditur nga ngjarja që ktheu pasigurinë dhe vëmendjen te vrasja e ndodhur më 14 shkurt, pas konfliktit banal për vendparkimin.