Disa vite më parë lajmi i tre anijeve ushtarake ruse të projektuara për operacione transporti që lundronin në Mesdhe disa kilometra larg brigjeve italiane, afër detit Jon ndoshta nuk do t'i interesonte askujt. Por në kushtet ku ndodhet bota sot, gjithcka ndryshon. Gazeta italiane La Repubblica shkruan se një flotilje shumë e veçantë ruse ka hyrë në Mesdhe dhe pritet të kalojë përmes kanalit sicilian. Flotilja ruse është e përbërë nga tre anije të projektuara për operacione transporti që kanë për qëllim zbarkimin e trupave dhe automjeteve sulmuese. Ngarkesa e saktë në këto tre anije nuk dihet, por zakonisht anije të tilla transportojnë armë, automjete dhe pajisje nga njëri port në tjetrin. Lëvizjen e tyre në Mesdhe La Repubblica e lidh me luftën në Ukrainë. Sipas gazetës italiane Moska, për shkak të përshkallëzimit të luftës, ka ndryshuar rrugën e anijeve të saj detare javët e fundit, duke shmangur kalimin përmes Detit të Zi për të arritur në portin sirian të Tartusit. Anijet ruse, shkruan gazeta “preferojnë të zgjasin rrugën se sa të rrezikojë të goditen nga raketat ukrainase”. Megjithatë flotilja ruse ka përshkruar rrugë detare të lejuara nga ligji ndërkombëtar. Ujërat Ndërkombëtare lejojnë çdo anije që të kalojnë në territoret e njohura ndërkombëtare siç është Mesdheu. Pamjet: AFP